Dëmshpërblim për aksidentet në punë
Punëdhënësi ka detyrimin ligjor të garantojë sigurinë tuaj në punë. Kur aksidenti vjen nga mosrespektimi i këtij detyrimi, keni të drejtë të kërkoni dëmshpërblim.
Detyrimet e punëdhënësit
Punëdhënësi detyrohet të sigurojë mbrojtjen e punëmarrësve në të gjitha aspektet që lidhen me sigurinë dhe shëndetin në punë. Detyrimet që ka vetë punëmarrësi nuk e cenojnë përgjegjësinë e punëdhënësit.
Pas çdo aksidenti, punëdhënësi duhet të njoftojë menjëherë Inspektoratin Shtetëror të Punës.
Ligji nr. 10237/2010 "Për sigurinë dhe shëndetin në punë", nenet 4 dhe 25.
Raste tipike
- Rënie nga lartësia në kantier, pa skela ose rripa sigurimi.
- Dëmtime nga makineri pa mbrojtëse ose pa trajnim.
- Aksidente me mjete pune ose gjatë transportit për punë.
- Mungesë e pajisjeve mbrojtëse: kaskë, doreza, këpucë, maska.
Çfarë mund të kërkoni
Përveç përfitimeve nga sigurimet shoqërore, mund të kërkoni dëmshpërblim nga punëdhënësi për dëmin pasuror dhe jopasuror: shpenzimet e mjekimit, të ardhurat e humbura, humbjen e aftësisë për punë dhe vuajtjen e shkaktuar. Kur aksidenti merr jetën e punëmarrësit, këtë të drejtë e kanë familjarët.
Gjykata e Lartë, me Vendimin unifikues nr. 12/2007, njohu të drejtën e të dëmtuarit dhe të familjarëve për shpërblimin e dëmit biologjik, moral dhe ekzistencial.
Çfarë të bëni
- Kërkoni menjëherë ndihmë mjekësore dhe ruani çdo dokument të spitalit.
- Sigurohuni që aksidenti të jetë raportuar te punëdhënësi dhe te Inspektorati.
- Mbani emrat e kolegëve që panë aksidentin.
- Ruani kontratën e punës, listëpagesat dhe çdo dokument për turnet dhe detyrat.
- Mos nënshkruani deklarata për shkakun e aksidentit pa u këshilluar.